சென்னையில் மழை முன்னெச்சரிக்கை பணிகள் தீவிரம் - மேயர் பிரியா தகவல்

சென்னை: சென்னை மாநகராட்சிக்குட்பட்ட பகுதிகளில் மழை முன்னெச்சரிக்கை பணிகள் மேற்கொள்ளப்பட்டு வருவதாக சென்னை மேயர் பிரியா கூறியுள்ளார். மேலும், கடந்த மழையின்போது, 24 மணி நேரத்துக்கும் மேலாக தண்ணீர் தேங்கி நின்ற இடங்கள் கண்டறியப்பட்டு, அப்பகுதிகளுக்கு தேவையான முன்னெச்சரிக்கை பணிகளை தொடங்கிவிட்டதாகவும் அவர் கூறியுள்ளார்.

சென்னை மாநகராட்சி மேயர் பிரியா இன்று (நவ.9) செய்தியாளர்களைச் சந்தித்தார். அப்போது மழை முன்னெச்சரிக்கை நடவடிக்கைகள் குறித்த கேள்விக்கு பதிலளித்த அவர், “சென்னையில் வரும் 14, 15ம் தேதிகளுக்குப் பிறகு கனமழை இருக்கும் என வானிலை மையம் கூறியிருக்கிறது. சென்னை மாநகராட்சிக்குட்பட்ட பகுதிகளை தமிழக முதல்வர் தொடர்ந்து கண்காணித்து வருகிறார். துணை முதல்வரும், ஒவ்வொரு பகுதிக்கும் நேரில் வந்து ஆய்வு மேற்கொண்டு வருகிறார். அமைச்சர்களும், எந்தெந்த பகுதிகளில் எல்லாம் தண்ணீர் தேங்கி நிற்கிறதோ, அந்தப்பகுதிகளில் எல்லாம் அவர்களும் நேரில் சென்று ஆய்வு செய்து வருகின்றனர்.