ஜெயம் ரவியின் ‘பிரதர்’ ட்ரெய்லர் எப்படி? -  ஜாலி காட்சிகளுடன் சென்டிமென்ட்!

சென்னை: ஜெயம் ரவி நடித்துள்ள ‘பிரதர்’ படத்தின் ட்ரெய்லர் வெளியாகி ரசிகர்களின் கவனத்தை ஈர்த்துள்ளது. ட்ரெய்லர் எப்படி?: ஜெயம் ரவி சட்டக் கல்லூரி மாணவர் என்பதை ட்ரெய்லரின் தொடக்கத்திலேயே உணர்த்திவிடுகிறார்கள். அரியர் வைத்துக்கொண்டு, அப்பாவிடம் திட்டு வாங்கும் வழக்கமான ஹீரோ கதாபாத்திரம் என்பது தெரிகிறது. ஒரு கட்டத்தில் வீட்டிலிருந்து வெளியேறி தனது அக்காவிட்டுக்கு செல்லும் ஜெயம் ரவிக்கு பிரியங்கா மோகன் இன்ட்ரோ கிடைக்கிறது.

தொடர்ந்து காதலையும் இலவச இணைப்பாக பெறுவதை கணிக்க முடிகிறது. எந்த இடத்திலும் சீரியஸ் இல்லாமல், ஜாலியாக நகர்கிறது ட்ரெய்லர். காமெடி முயற்சிகளும் மேற்கொள்ளப்பட்டுள்ளன. ”ஊர்ல 4,5 தம்பிங்கள வைச்சிருக்கவங்கல்லாம் சந்தோஷமா இருக்காங்க, ஒரே ஒரு தம்பிய வைச்சிட்டு நான் பாட்ற அவஸ்த இருக்கே” என பூமிகா பேசும் வசனத்துடன் ட்ரெய்லர் முடிகிறது. அக்கா - தம்பி பாசத்தை உள்ளடக்கிய ஜாலியான ஃபேமிலி ட்ராமாவாக இப்படம் உருவாகியிருப்பதை ட்ரெய்லர் உணர்த்துகிறது.