கோவை - திண்டுக்கல் சிறப்பு ரயிலில் 100-க்கும் குறைவானவர்கள் பயணம்: கடைசி நேர அறிவிப்பால் அவலம்

கோவை: கோவை - திண்டுக்கல் இடையிலான சிறப்பு ரயில் சேவையை கடைசி நேரத்தில் அறிவித்ததால் பெரும்பாலான மக்களுக்கு இந்த ரயில் இயக்கம் குறித்து தெரியவில்லை. இதனால் 2,000-க்கும் மேற்பட்டோர் பயணிக்கும் ரயிலில் 100-க்கும் குறைவானவர்களே கோவையிலிருந்து பயணித்தனர்.

தீபாவளி பண்டிகையை முன்னிட்டு கோவையில் இருந்து அனைத்து வழித்தடங்களிலும் ரயில் மற்றும் பேருந்துகளில் மக்கள் கூட்டம் அலைமோதுகிறது. கோவையில் இருந்து மதுரைக்கு ரயில் இயக்கப்பட்டு வரும் நிலையில் கோவை - திண்டுக்கல் இடையே தீபாவளியை முன்னிட்டு சிறப்பு ரயில் இயக்கப்படுவதாக நேற்று (அக்.29) மாலைக்கு மேல் ரயில் நிர்வாகம் அறிவித்தது. அக்டோபர் 30-ம் தேதி முதல் நவம்பர் 6-ம் தேதி வரை (ஞாயிறு தவிர்த்து) கோவை - திண்டுக்கல் இடையே முன்பதிவு இல்லாத சிறப்பு ரயில் இயக்கப்படுகிறது.