“விஜய்யின் தவெக யாருக்கும் 'பி டீம்’ ஆக இருப்பதாக தெரியவில்லை” - ஜி.கே.வாசன் கருத்து

மயிலாடுதுறை: தமிழக வெற்றிக் கழகம் டெல்லியில் இருக்கக் கூடிய கட்சிக்கோ அல்லது தமிழகத்தில் இருக்கக் கூடிய கட்சிக்கோ ’பி டீமாக’ இருப்பதாகத் தெரியவில்லை என தமிழ் மாநில காங்கிரஸ் தலைவர் ஜி.கே.வாசன் கூறியுள்ளார்.

மயிலாடுதுறை அருகேவுள்ள எலந்தங்குடியில் இன்று திருமண நிகழ்வு ஒன்றில் பங்கேற்க வந்த வாசன் செய்தியாளர்களிடம் கூறியது: “தமிழ் மாநில காங்கிரஸ் கட்சியின் உறுப்பினர் சேர்க்கை விறுவிறுப்பாக நடைபெற்று வருகிறது. உறுப்பினர் சேர்க்கை முடிந்த பின்னர் டிசம்பர் முதல் வாரத்தில் சென்னை, தஞ்சை, கோவை, மதுரை ஆகிய மண்டலங்களுக்கு நான் சென்று நிர்வாகிகளை சந்தித்து உறுப்பினர் அட்டைகளை ஒப்படைக்க உள்ளேன். சம்பா தாளடி சாகுபடி பணிகளை விவசாயிகள் தாமதமாக தொடங்கியுள்ளதால், பயிர்க் காப்பீட்டுக்கான பிரீமியம் தொகை செலுத்துவதற்கான இறுதி தேதி நவ.15 என்பதை நவ.30-ம் தேதி வரை நீட்டிக்க வேண்டும்.