திண்டுக்கல்லில் விடிய விடிய கொட்டிய மழை: பழநியில் வீடுகளுக்குள் புகுந்த தண்ணீர்

திண்டுக்கல்: திண்டுக்கல் மாவட்டம் முழுவதும் நேற்று இரவு முதல் வெள்ளிக்கிழமை (இன்று) காலை வரை விடிய விடிய மழை கொட்டி தீர்த்தது. பழநியில் வீடுகளுக்குள் தண்ணீர் புகுந்ததால் பொதுமக்கள் பாதுகாப்பான இடங்களில் தங்க வைக்கப்பட்டுள்ளனர்.

திண்டுக்கல் மாவட்டம் முழுவதும் கடந்த 2 நாட்களாக பரவலாக மழை பெய்து வருகிறது. இந்நிலையில் நேற்று (டிச.12) இரவு முதல் வெள்ளிக்கிழமை (இன்று) காலை வரை மாவட்டம் முழுவதும் விடிய விடிய மழை கொட்டித் தீர்த்தது. இதனால் திண்டுக்கல் மாவட்ட பள்ளிகளுக்கு மட்டும் விடுமுறை அளிக்கப்பட்டது. பலத்த மழையால் அணைகள், நீர் நிலைகளுக்கு நீர் வரத்து அதிகரித்து வெள்ளப் பெருக்கு ஏற்பட்டுள்ளது. அணை மற்றும் ஆற்றங்கரையோர மக்களுக்கு வெள்ள அபாய எச்சரிக்கை விடுக்கப்பட்டுள்ளது.