திண்ணை: மனுஷ்யபுத்திரன் 50

தமிழ் நவீனக் கவிஞர்கள் பலரிடமும் தாக்கத்தை உண்டாக்கியவர் கவிஞர் மனுஷ்யபுத்திரன். ‘என் படுக்கையறையில் யாரோ ஒளிந்திருக்கிறார்கள்’ தொகுப்பின் எளிமையும் செளந்தர்யமும் கூடிய மொழி, தமிழ்க் கவிதை வெளியில் புதிய வசீகரத்தை உருவாக்கியது. ‘இடமும் இருப்பும்’, ‘நீராலானது’ ஆகிய அவரது தொகுப்புகளால் தமிழ் நவீனக் கவிதையின் வாசகப் பரப்பு விரிவுகொண்டது. ஃபேஸ்புக்கில் அவர் தொடர்ந்து எழுதிவரும் கவிதைகள் மிகப் பெரிய வாசகப் பரப்பில் தொடர்ந்து கவனம் பெற்றுவருகிறது.

தமிழ்க் கவிதை உலகில் மனுஷ்யபுத்திரனுக்கு இது நாற்பதாம் ஆண்டு. இந்த ஆண்டில் அவரது 50ஆவது கவிதைத் தொகுப்பான ‘உன்னை யாரும் அணைத்துக்கொள்ளவில்லையா?’ வெளிவரவிருக்கிறது. சென்ற ஆண்டு அவர் எழுதிய 1,458 கவிதைகளின் தொகுப்பு இது. 1,768 பக்கங்களில் பெருந்தொகுப்பாக வெளிவரவுள்ளது. இதன் வெளியீட்டு நிகழ்வு நாளை (7.1.2023) மாலை 3.30 மணிக்கு சென்னைப் புத்தகக் காட்சி சிந்தனை அரங்கில் நடைபெறவுள்ளது. தொடர்புக்கு: 90032 18208.