‘குறளில் மேலாண்மை’ ஆங்கில நூல் வெளியீட்டு விழா: ‘இந்து தமிழ் திசை’ பதிப்பகம் வெளியீடு

திருச்சி: எழுத்தாளர் சோம.வீரப்பன் எழுதிய `திருக்குறளில் மேலாண்மை' தொடர்பான ‘தி ஆர்ட் ஆஃப் ஜாகிங் வித் யுவர் பாஸ்’ (The art of jogging with your boss) என்ற ஆங்கில நூல் வெளியீட்டு விழா திருச்சியில் நேற்று முன்தினம் நடைபெற்றது. திருச்சி பெல் கைலாசபுரம் டவுன்ஷிப் மனமகிழ் மன்றத்தில் நடைபெற்று வரும் புத்தகத் திருவிழாவில் இந்த நிகழ்ச்சி நடைபெற்றது.

‘இந்து தமிழ் திசை’ பதிப்பகம் வெளியிட்டுள்ள இந்த நூலை, பெல் நிறுவன பொது மேலாளர் ஐ.கமலக்கண்ணன் வெளியிட்டுப் பேசினார். முதல் பிரதியை பெற்றுக்கொண்ட பாரதிதாசன் மேலாண்மை நிறுவனத்தின் உதவிப் பேராசிரியர் மஃப்ரூஜா சுல்தானா, இந்த நூலைவங்காள மொழியில் மொழிபெயர்க்க தங்களது நிறுவனத்தின் இயக்குநர் பர்மா விருப்பம் தெரிவித்துள்ளதாக கூறினார்.