திண்ணை: புக்கர் பட்டியலில் பெருமாள்முருகன்!

சர்வதேச அளவில் உயரிய இலக்கிய விருதுகளில் ஒன்று புக்கர். இந்த விருதின் 54 ஆண்டுகால வரலாற்றில், ஒரு தமிழ் நூல் அதன் தொடக்கப் பட்டியலில்கூட இடம் பெற்றதில்லை. முதல் முறையாக இதன் நெடும் பட்டியலில் 13 நூல்களில் ஒன்றாக பெருமாள்முருகனின் ‘பூக்குழி’ நாவலின் ஆங்கில மொழிபெயர்ப்பு (‘Pyre’) நூல் இடம்பிடித்துள்ளது. அனிருத்தன் வாசுதேவன் இதை மொழிபெயர்த்துள்ளார்.இங்கிலாந்தைச் சேர்ந்த புஷ்கின் பிரஸ், பெருமாள் முருகனின் ‘மாதொருபாகன்’, ‘பூனாச்சி அல்லது ஒரு வெள்ளாட்டின் கதை’, ‘பூக்குழி’ ஆகிய நாவல்களுக்கான பிரிட்டன் (UK) உரிமையைக் காலச்சுவடு பதிப்பகத்திடமிருந்து பெற்றது. இந்த விருது பிரிட்டன் பதிப்பு நூல்களுக்கு மட்டுமானது என்பது குறிப்பிடத்தக்கது. சென்ற ஆண்டு இந்த விருது, கீதாஞ்சலி எழுதிய ‘ரீத் சமாதி’ இந்தி நாவலின் மொழிபெயர்ப்புக்கு வழங்கப்பட்டது. தொடர்ந்து இரண்டாம் முறையாக இந்திய மொழி நூல் ஒன்று இந்தப் பட்டியலில் இடம்பெற்றுள்ளது.