டங்ஸ்டன் விவகாரத்தில் பிரச்சினையை உருவாக்கும் திமுக; தீர்வு காணும் பாஜக: அண்ணாமலை கருத்து

டங்ஸ்டன் சுரங்க விவகாரத்தை தமிழக அரசு இன்னும் சிறப்பாக கையாண்டிருக்க வேண்டும். டங்ஸ்டன் விவகாரத்தில் திமுக பிரச்சினையை உருவாக்குகிறது. அதற்கு தீர்வை பாஜக கொடுக்கிறது என மாநில தலைவர் அண்ணாமலை தெரிவித்துள்ளார்.

டெல்லி சென்றுள்ள அண்ணாமலை செய்தியாளர்களிடம் நேற்று கூறியதாவது: தமிழகத்தில் மழை வெள்ளத்தால் பாதிக்கப்பட்ட பகுதிகளை, தமிழக அரசு அதிகாரிகளுடன் சேர்ந்து, மத்திய அரசு அதிகாரிகள் ஆய்வு செய்துவிட்டு சென்றுள்ளனர். மத்திய அரசின் பார்வையில், தமிழகத்தில் மிகவேகமாக வேலைகள் நடந்து கொண்டிருக்கின்றன. அந்தவகையில், தமிழகத்தில் மாநில பேரிடர் நிவாரண நிதி 100 சதவீதம் முழுமையாக பயன்படுத்தப்படும். ஆளும் கட்சியில் 40 எம்.பி.க்கள் இருந்தாலும், பாஜக தலைவர்கள் தான் தமிழக மக்களுக்காக ஆக்கப்பூர்வமாக உழைத்து கொண்டிருக்கின்றனர்.