ஒரே நேரத்தில் ‘விடாமுயற்சி’, ‘குட் பேட் அக்லி’ ரிலீஸ் - தலையிடுவாரா அஜித்?

சென்னை: அஜித்தின் ‘விடாமுயற்சி’ மற்றும் ‘குட் பேட் அக்லி’ ஆகிய படங்கள் ஒரேசமயத்தில் வெளியாகும் சூழல் உருவாகி இருக்கிறது. அஜித் நடிப்பில் உருவாகி வரும் படங்கள் ‘விடாமுயற்சி’ மற்றும் ‘குட் பேட் அக்லி’. இதில் ‘குட் பேட் அக்லி’ திரைப்படம் அறிவிக்கப்பட்ட போதே பொங்கல் வெளியீடு என்று படக்குழு அதிகாரபூர்வமாக தெரிவித்தது. அதே சமயத்தில் ‘விடாமுயற்சி’ படமோ படப்பிடிப்பு தாமதமாகிக் கொண்டே வந்ததால், எப்போது வெளியீடு என்று அறிவிக்கப்படாமல் இருந்தது. சமீபத்தில் ’விடாமுயற்சி’ டீசர் இணையத்தில் வெளியிடப்பட்டது.

அதில் ‘பொங்கல் 2025’ என்று அறிவித்து அனைவரையும் ஆச்சரியப்படுத்தினார்கள். ஒரே சமயத்தில் ஒரு நடிகரின் 2 படங்கள் வெளியாக வாய்ப்பில்லை. ஆனால், படக்குழுவினர் ஒருவரை ஒருவர் தொடர்புக் கொள்ளாமல் போட்டி போட்டு அறிவித்திருப்பது விநியோகஸ்தர்கள் மத்தியில் பெரும் கோபத்தினை உருவாக்கி இருக்கிறது. ‘குட் பேட் அக்லி’ படம் தான் முதலில் பொங்கல் வெளியீடு என்று உறுதிப்படுத்தினார்கள்.